Lungnabólga

Lungnabólga (e. pneumonia) er sýking og getur komið fram í öðru eða báðum lungum. Oftast er hún af völdum baktería en getur líka verið vegna veiru- eða sveppasýkinga. Á endum berkjanna í lungunum eru klasar af litlum loftblöðrum sem fyllast af vökva við lungnabólgu og veldur skertri öndun. Veirur eru algeng orsök lungnabólgu hjá ungum börnum til dæmis RS-veira. Lungnabólga af völdum sveppa leggst helst á fólk með skert ónæmiskerfi. Hætta á lungnabólgu eykst ef fólki svelgist á eða aðskotahlutur fer í lungu.

Lungnabólga er alvarlegur sjúkdómur, þau sem veikjast geta orðið mjög þungt haldin og verið lengi að jafna sig. 

Einkenni lungnabólgu geta komið á einum til tveimur sólarhringum en þau geta líka gert vart við sig á nokkrum dögum.

Dæmigerð einkenni eru:

• Hósti, getur verið þurr eða með þykku gulu, grænu eða brúnu slími
• Hraður hjartsláttur
• Mæði og andþyngsli
• Hiti - hjá börnum - hjá fullorðnum
• Hrollur
• Lystarleysi
• Verkur í brjóstkassa sem versnar við öndun eða hósta
• Slappleiki og þreyta
• Höfuðverkur
• Ógleði eða uppköst
• Óáttun, sérstaklega meðal eldra fólks

Hjá börnum eru hiti og hósti algengustu einkennin en hröð öndun og öndunarerfiðleikar geta einnig verið vísbending um lungnabólgu.

Nýburar og mjög ung börn eiga oft erfitt með að nærast og hvílast, ef þau veikjast af lungnabólgu.

Eldra fólk getur verið hitalaust, órólegt og/eða óáttað, getur ekki séð um sig sjálf og þarf stundum að leggjast inn á sjúkrahús.

• Sjúkrasaga og skoðun
• Lungnahlustun
• Blóðrannsókn
• Hrákasýni
• Röntgen mynd

Það getur verið erfitt að greina lungnabólgu því stundum geta einkenni annarra sjúkdóma jafnframt verið til staðar eins og t.d. astma og berkjubólgu.

Meðferð byggist á að lækna sýkinguna og koma í veg fyrir fylgikvilla.

• Væga lungnabólgu vegna veirusýkingar má yfirleitt meðhöndla heima með einkennameðferð. 
• Væga lungnabólgu vegna bakteríusýkingar má yfirleitt meðhöndla heima með sýklalyfjum, hvíld og vökva. Mikilvægt er að taka lyfin eftir fyrirmælum læknis.
• Alvarlegri tilfelli þurfa meðferð á sjúkrahúsi.
• Ef aðskotahlutur er í lunga þarf að fjarlægja hann með berkjuspeglun.

Að meðferð lokinni ættu einkenni að lagast, en tíminn sem það tekur fer eftir aldri, alvarleika lungnabólgunnar og eðli einkenna. 

Eftir:

• Eina viku – ætti hiti að vera horfinn
• Fjórar vikur – ætti brjóstverkur og slímmyndun að hafa minnkað verulega
• Sex vikur – ætti hósti og mæði að hafa minnkað verulega
• Þrjá mánuði – Flest einkenni að hafa gengið til baka en þú gætir ennþá fundið fyrir þreytu

• Drekka vel - Það kemur í veg fyrir ofþornun.
• Hvíld - Líkamanum veitir ekki af allri orku í að berjast við sýkinguna.
• Nota góðgerla til að minnka líkur á magavandamálum tengdum sýklalyfjatöku. Dæmi um góðgerla: Acidophilus, LGG+ og AB mjólk.
• Nota slímlosandi freyðitöflur, lausasölulyf sem fæst í apótekum.
• Taka sýklalyf samkvæmt fyrirmælum læknis. Mikilvægt er að klára lyfjaskammtinn.
• Verkjalyf sem fást án lyfseðils í apótekum, eins og til dæmis paracetamól, geta minnkað verki og lækkað hita.
• Volgt vatn með engifer, hunangi og sítrónu hjálpar til við slímlosun, mýkir háls og getur minnkað óþægindi við hósta.
• Forðast reykingar - Ef þú reykir er mikilvægt að hætta. Reykingar skemma lungun. Ráð til þess að hætta að reykja.

Leitaðu til næstu heilsugæslu ef:

• Einkenni minnka ekki eftir þrjá til fjóra daga á sýklalyfjum
• Einkennin aukast
• Hiti (>38°C) í yfir þrjá sólarhringa og engin batamerki
• Uppgangur á grænu, gulu eða brúnu slími í yfir þrjá sólarhringa
• Áhyggjur af líðan

Leitaðu til bráðamóttöku ef:

• Alvarleg ofnæmiseinkenni eins og andþyngsli, bólga í andliti, vörum, tungu eða koki.
• Einkenni eins og hröð öndun, brjóstverkur eða óáttun.

Finna næstu heilsugæslu eða bráðamóttöku.

Þótt lungnabólga sé oftast af völdum baktería, sem geta borist á milli fólks er hún ekki sjúkdómur, sem smitast auðveldlega. Ónæmiskerfið ræður í flestum tilvikum við smitið. Eftirfarandi hópar eru í aukinni áhættu.

• Ung börn
• Fólk eldra en 65 ára
• Reykingafólk
• Vannærðir
• Fólk með langvinna sjúkdóma eins og til dæmis sykursýki, hjartabilun
• Fólk með lungnasjúkdóma eins og astma, eða lungnateppu
• Fólk með veiklað ónæmiskerfi
• Fólk sem hefur skert hóstaviðbragð til dæmis af völdum heilablóðfalls, áfengisneyslu, slævandi lyfja eða skertrar hreyfigetu
• Fólk sem hefur nýlega verið með veirusýkingu eins og kvef eða inflúensu