Fara á efnissvæði
Fara á efnissvæði

Bjúgur

Kaflar
Útgáfudagur

Bjúgur (e. edema) myndast þegar vökvasöfnun verður í vefjum líkamans. Oftast sést bjúgur á rist eða ökkla en hann getur einnig komið fram í öðrum líkamshlutum eins og á kvið, höndum og í andliti. Bjúgur getur takmarkað hreyfingar í útlimum og valdið óþægindum. Ef bjúgur er viðvarandi er ráðlagt að leita læknis.

Einkenni

  • Bólginn ökkli eða fótleggur
  • Húð yfir bólgu er glansandi, teygð og mögulega rauðleit
  • Ef þrýst er með fingri á bólgið svæði myndast dæld í húðinni
  • Far myndast eftir tímabundinn þrýsting t.d. eftir stroff á sokkum
  • Verkir í fótum
  • Þreyta í fótum
  • Kláði yfir bólgustað
  • Þyngdaraukning á skömmum tíma
  • Mæði

Orsakir

Bjúgur getur myndast af mörgum ástæðum. Dæmi um orsakir: 

Saltrík fæða getur valdið bjúg á fótum sérstaklega ef ekki er drukkið nægjanlegt vatn

Kyrrseta og langar stöður. Að vera á hreyfingu hjálpar til.

Meðganga er álag fyrir líkamann og bjúgur einn þeirra meðgöngukvilla sem geta fylgt 

Áverkar til dæmis tognun á fæti

Umbúðir eins og gifs, teygjubindi, þröngir sokkar eða þröngir skór geta valdið bjúg

Skordýrabit bólgna gjarnan upp og geta valdið bjúg 

Löngum bíl- og flugferðum fylgir oft mikil kyrrseta því er gott að standa upp reglulega og gera fótaæfingar til að minnka bjúgsöfnun. Ráð til að draga úr líkum á blóðtappa og bjúgmyndun á löngum ferðalögum

Aukaverkun lyfja. Hafir þú grun um að svo geti verið er gott að lesa um aukaverkanir þeirra lyfja sem þú notar. Á sérlyfjaskrá má finna fylgiseðla lyfja.

Hjartabilun fylgir oftast bjúgur

Hjartaþelsbólga lýsir sér meðal annars með bjúgmyndun í líkamanum

Hvað get ég gert?

Það er ýmislegt hægt að gera til að koma í veg fyrir vökvasöfnun til dæmis: 

  • Regluleg hreyfing til að auka blóðflæði í fótum
  • Fótaæfingar þegar setið er, kreppa tær og teygja úr sér við hvert tækifæri
  • Hafa hátt undir fótum í hvíld, nota skemil eða kodda undir fætur
  • Forðast kyrrstöðu með hangandi fætur
  • Forðast heit böð
  • Forðast langar stöður því þá hækkar þrýstingur er veldur bjúg í fótleggjum
  • Nota stuðningssokka á daginn
  • Nota stuðningssokka (flugsokka) í lengri bíl- og flugferðum: standa reglulega upp og ganga um
  • Huga að mataræði og takmarka neyslu á salti

Hvenær skal leita aðstoðar?

Leitaðu strax á næstu bráðamóttöku ef:

  • Skyndilega kemur mikill bjúgur á fætur
  • Erfiðleikar eru við öndun
  • Aukin mæði
  • Verkur fyrir brjósti, þrýstingur eða þyngsl yfir brjóstkassa

Ráðlagt er að leita heilsugæsluna ef:

  • Bjúgur lagast ekki við það hækka undir fótum, ganga um eða minnka setu
  • Bjúgur eykst á fótum
  • Bjúgur er á öðrum fæti með verk sem ekki tengist áverka
  • Skyndilegur hiti eða roði myndast á fótlegg

Finna næstu heilsugæslustöð og bráðamóttöku.