Upplýsingar og leiðsögn um heilsugæsluna

Almennar bólusetningar

Barnabólusetningar gegn stífkrampa, barnaveiki, kíghósta og mænusótt þarf að endurtaka á 10 ára fresti. 

60 ára og eldri eða fólk haldið langvinnum sjúkdómum ætti að láta bólusetja sig gegn inflúensu og lungnabólgu af völdum Pnemokokkabakteríunnar.

Ef bólusetningar hafa átt sér stað utan Íslands er hægt að koma á heilsugæsluna með bólusetningarvottorð og fá sprauturnar skráðar inn í Heilsuveru.  

Nánar um fyrirkomulag barnabólusetningar.

Nánar um viðhald bólusetninga.

Ferðamenn

Á netspjalli Heilsuveru er hægt að óska eftir ráðleggingum um þær bólusetningar sem þarf fyrir ferðalög. Staðlaðar spurningar koma um ferðalagið og bólusetningaráætlun kemur síðan inn á mínum síðum Heilsuveru eftir 3-10 virka daga.

Fólk fær tilkynningu þegar áætlunin er tilbúin. Við gerð á bólusetningaráætlun er meðal annars tekið til skoðunar fyrri bólusetningar og tímalengd dvalar.

Þegar fólk er komið með bólusetningaráætlun er hægt að mæta í Þönglabakka 1. 109 Reykjavík alla virka daga milli kl. 09:00-15:00 og fá bólusetningu hjá hjúkrunarfræðingi. 

Nánar um bólusetningar ferðamanna. 

Þjónusta meðgönguverndar er ókeypis og geta verðandi foreldrar fengið þjónustu frá heilsugæslustöð í sínu hverfi eða valið aðra stöð. Skráning á heilsugæslustöð eða breyting á skráningu má gera rafrænt. Leiðbeiningar um skráningu og breytingu á skráningu á heilsugæslustöð.

Viðtöl og skoðanir eru í boði frá upphafi meðgöngu og fram að fæðingu. Fyrsta viðtal við ljósmóður er gjarnan í síma fljótlega eftir að þungun er staðfest með þungunarprófi. Mælt er með að fyrsta koma sé fyrir 12 vikna meðgöngu. Fjöldi skoðana fer svo eftir aðstæðum, oftast 8-10 skipti. Milli skoðana er hægt að fá símaráðgjöf hjá ljósmóður.

Til að bóka fyrsta viðtal þarf að hringja á þá heilsugæslustöð sem óskað er eftir þjónustu frá. 

Nánari upplýsingar um meðgönguvernd. 

Ung- og smábarnavernd tekur við af meðgönguvernd þegar fjölskyldan kemur heim frá fæðingarstað og heimaþjónustu ljósmæðra lýkur.

Fyrstu vikurnar eftir fæðingu er hægt að fá vitjun frá hjúkrunarfræðingi heilsugæslunnar. Foreldrar eru beðnir um að hafa samband við hjúkrunarfræðing fljótlega eftir að heim er komið til að bóka fyrstu vitjun.

Fyrsta læknisskoðun á heilsugæslustöðinni er við 6 vikna aldur. 
Reglubundnar skoðanir eru hjá hjúkrunarfræðingi og lækni til skólaaldurs. Þá er fylgst með vexti og þroska barnanna og bólusetningum. Í skoðunum er ráðlagt meðal annars um brjóstagjöf, svefnvandamál, aga og uppeldi, matarræði og slysavarnir. Auk þess er hægt að fá samband við hjúkrunarfræðing ef spurningar vakna varðandi barnið. 

Nánar um ung- og smábarnavernd.

Hjúkrunarfræðingar og læknar á heilsugæslustöðvum sjá um heilsuvernd skólabarna í hverfi stöðvanna. 
Helstu áherslur í heilsuvernd skólabarna eru:

• Fræðsla og heilsuefling
• Bólusetningar
• Skimanir 
• Viðtöl um heilsu og líðan
• Umsjón og eftirlit með umönnun langveikra barna innan skólans
• Ráðgjöf til nemenda, fjölskyldna þeirra og starfsfólks skólans 

Hægt er að fá símasamband við skólahjúkrunarfræðingana í gegnum skiptiborð skólanna.  

Nánar um heilsuvernd grunnskólabarna.

Hér á landi er skimað fyrir leghálskrabbameini og brjóstakrabbameini.

Leghálskrabbameinsskimun

Boðið er upp á skimun fyrir leghálskrabbameini á aldrinum 23 - 29 ára á  þriggja ára fresti og á aldrinum 30 til 64 ára á fimm ára fresti. Tímapantanir á heilsugæslunni og á mínum síðum Heilsuveru eftir að boð hefur borist.

Brjóstakrabbameinsskimun

Einkennalausar konur á aldrinum 40 ára til 74 ára sem hafa fengið boðsbréf í skimun fyrir brjóstakrabbameini geta pantað tíma. Nánar um tímapantanir á vefsíðu Brjóstamiðstöðvar Landspítala.

Inn á þjónustuvefsjá Heilsuveru má sjá hvernig fyrirkomulagið er á skimunum um allt land. Velja þarf heilsugæslustöð á kortinu og smella á krabbameinsskimun undir þjónustu. Við hvetjum konur til að kynna sér þjónustuna vel og bregðast jákvætt við boði um skimun. 

Skimun fyrir krabbameini í ristli og endaþarmi - Innleiðing er að hefjast.

Skimunaraðferðin felst í sjálfsprófi sem greinir blóð í hægðum, svokölluðu FIT-prófi (Fecal Immunochemical Test). 
 
Sýnið er tekið heima fyrir og sent til rannsóknar á Landspítala. Ef blóð greinist, er einstaklingnum boðin ristilspeglun til frekari skoðunar.
 
Þegar framkvæmd hefst er áætlað að byrja á því að skima aldurshópinn 60-69 ára. Þegar innleiðingu er lokið er áætlað að einstaklingum á aldrinum 50-74 ára verði boðin þátttaka. Áætlað er að innleiðingu ljúki árið 2031.

Frekari upplýsingar um fyrirkomulag krabbameinsskimana má finna hjá Samhæfingarstöð krabbameinsskimana. 

Ef óskað er eftir að láta skima fyrir kynsjúkdómum er hægt að bóka tíma á heilsugæslu eða hjá göngudeild kynsjúkdóma Landspítalans í síma eða í smáforriti Landspítalans. 

Frekari upplýsingar um kynsjúkdóma. 

Hægt er að endurnýja lyfseðla á mínum síðum Heilsuveru. 

Einnig er hægt endurnýja í lyfjasíma heilsugæslustöðvanna. Fyrirkomulag lyfjasíma er kynnt á síðu heilsugæslustöðvarinnar.

Hvaða lyf er hægt er að endurnýja:

Þú getur óskað eftir að endurnýja lyf sem þú tekur að staðaldri og þinn heimilislæknir eða annar læknir á stöðinni hefur ávísað.

Sýklalyf, sterk verkjalyf, róandi lyf eða svefnlyf eru bara endurnýjuð í viðtali en lyfjaskömmtun getur verið góður kostur fyrir þessi lyf.

Fjölnota lyfseðlar:

Til að spara tíma og fyrirhöfn er lögð áhersla á notkun fjölnota lyfseðla fyrir lyf sem notuð eru að staðaldri. Slíkir lyfseðlar geta dugað í allt að eitt ár.

Til að fá fjölnota lyfseðil þarf að koma í viðtal til læknis.

Hægt að sjá myndband sem sýnir lyfjaendurnýjun.

Ef óskað er eftir blóðrannsókn þarf að hafa tilvísun frá lækni. Hægt er að bóka tíma hjá heimilislækni á næstu heilsugæslustöð. Þegar beiðni fyrir blóðprufu liggur fyrir þarf að hringja á heilsugæsluna og bóka tíma í blóðprufu eða mæta á rannsóknardeild Landspítala á opnunartíma.  

Til þess að fá tíma hjá sálfræðingi heilsugæslunnar þarf að bóka tíma hjá heimilislækni og óska eftir tilvísun. Einnig er hægt bóka beint á stofu sálfræðings. Komugjald á heilsugæslu á dagvinnutíma er 500 kr. en komugjald á stofu er hærra.  

Hægt er að sækja um veikindavottorð á mínum síðum Heilsuvera.is fyrir skammvinn veikindi.

Valið er: Skilaboð, ný skilaboð, vottorð – atvinnurekenda og skólavottorð.
Greitt er fyrir vottorðið sem birtist á mínum síðum eftir nokkra daga.

Fyrir langinn veikindi og önnur vottorð þar að hafa samband við heilsugæsluna og bóka tíma hjá heimilislækni. 

Læknavaktin sinnir vaktþjónustu á höfuðborgarsvæðinu þar sem aðeins sérfræðingar í heimilislækningum og reyndir sérnámslæknar veita læknisþjónustu alla virka daga frá kl: 17:00 - 22:00 og frá kl: 9:00 - 22:00 um helgar og á helgidögum.

Hægt er að óska eftir vitjun í síma 1700 frá kl.17:00 á virkum dögum en frá kl. 08:00 um helgar og helgidaga. Vitjunum lýkur fyrir kl. 23:30 alla daga.

Greiðsluþátttaka Sjúkratrygginga er fyrir 6 skipti í sjúkraþjálfun á ári án tilvísunar frá lækni. (Gildir eingöngu hjá sjúkraþjálfurum sem eru með samning við SÍ). Tilvísun gefur 15 skipta heimild í eitt ár frá upphafi meðferðar. 

Börn 2 -17 ára greiða ekkert gjald fyrir sjúkraþjálfun með framvísun beiðni frá lækni. Börn undir 2 ára aldri greiða ekkert gjald.  

Upplýsingar varðandi sjúkratryggingar má finna á Ísland.is.

Hægt er að bóka tíma beint hjá sérfræðilækni. Börn undir 2 ára aldri fá niðurgreidda þjónustu en börn frá 2 ára til og með 17 ára fá niðurgreiðslu á þjónustu ef beiðni/tilvísun frá heimilislækni er fyrir hendi. Án tilvísunar er greitt 30% samkvæmt gjaldskrá Sjúkratrygginga.