Slysavarnir 6-11 mánaða

Slys af völdum falls eykst til muna á þessum aldri.

• Gott er að venja barnið við að nota beisli í matarstól strax frá fyrsta degi. Til þess að koma í veg fyrir að stóllinn sporðreisist er hann festur við borðið. Matarstólar sem framleiddir voru fyrir árið 2013 geta verið mjög valtir og því ekki öruggir í notkun.
• Ef barni er lyft upp á húsgagn og það skilið þar eftir eitt er hætta á falli.
• Hliðar rúms ættu að vera í hæstu stillingu og rúmbotn í þeirri lægstu. Barnið gæti farið að klifra úr rúminu.
• Ekki er mælt með notkun göngugrinda. Barn í göngugrind er í meiri hættu að slasa sig þar sem þau geta náð í hluti sem þau annars myndu ekki ná í.
• Ekki er mælt með notkun hoppuróla. Börn hafa slasast við að detta úr þeim.
• Öryggishlið ættu að vera lokuð bæði við efra og neðra stigaop.
• Ekki er ráðlagt að hafa barnarúm við glugga.
• Upplagt er að setja öryggislæsingar á alla glugga.
• Bil milli rimla í rúmi, í stiga og svalahandriðum má ekki vera meira en 9 cm.

• Best er að barnið sé á öruggum stað á meðan verið er að elda svo það komist ekki að hitagjöfum.
• Gott er að venja sig á að drekka aldrei heita drykki með barn í fanginu.
• Logandi kerti, kveikjarar og eldspýtur ættu að vera þar sem börn ná ekki til.
• Lampar og lampasnúrur ættu að vera þannig að barn nái ekki til þeirra. Einnig ættu fjöltengi að uppfylla nýjar kröfur um innbyggða öryggislæsingu.
• Ekki ætti að nota straujárn á meðan barnið er nálægt. Straujárnið ætti að kólna þar sem barnið nær ekki til.
• Snúrur raftækja ættu ekki að hanga niður af borðum en hægt er að stytta þær með snúrustytti.
• Miðstöðvarofnar geta hitnað hættulega mikið og gæta þarf þess að barn snerti ekki heita ofna.
• Best er að nota aftari hellur á eldavél eða snúa handföngum og sköftum að vegg eða nota öryggishlíf á eldavélina.
• Bakaraofnar geta hitnað mikið að utan. Því er gott að setja öryggishlíf og tryggja að barnið geti ekki opnað ofninn.
• Verja þarf börn fyrir sólinni og nota sólarvörn sérstaklega ætlaða ungum börnum. Einnig gæta þess að börn séu ekki útsett fyrir mikilli sól nema örstutta stund í einu.

• Notið viðurkenndar sængur eða værðarpoka og engan kodda fyrsta árið.
• Verið hjá barninu á meðan það er að borða eða drekka og venjið það á að sitja kyrrt á meðan það borðar eða drekkur.
• Fjarlægið smáhluti sem eru hættulegir fyrir barnið.
• Fylgist með eldri börnum og kennið þeim að setja ekkert í munn ung- og smábarna og láta þau ekki hafa smáhluti eða leikföng sem innihalda smáhluti.
• Blöðrur henta ekki börnum á þessum aldri. Geymið plastumbúðir og poka þar sem börn ná ekki til.
• Verið viss um að föt og skartgripir þrengi ekki á hálsi barnsins. Fjarlægið reimar úr fatnaði.
• Notið ekki hárbönd fyrir börn yngri en 1 árs
• Styttið gardínusnúrur eða hengið upp svo börn nái ekki til.
• Setjið ekki barnarúm eða rúm við glugga þar sem gardínusnúrur hanga lausar. Gott er að festa snúrur við gluggakarm með þar til gerðri öryggisfestingu.

• Barn á þessum aldri getur drukknað í 2-5 cm djúpu vatni.
• Látið barn aldrei leika sér eitt nálægt pollum eða vatni.
• Víkið aldrei frá barni í baði, ekki eitt augnablik.
• Baðsæti eru ekki öryggisbúnaður. Aldrei skilja barn eftir í slíku sæti eitt augnablik.
• Tæmið alltaf vaðlaugar og fötur eftir notkun.
• Setjið alltaf öryggislok yfir heitan pott strax eftir notkun.
• Börn undir 12 ára aldri hafa ekki þroska til að bera þá ábyrgð að gæta kornabarns í baði.

• Fylgist reglulega með barninu meðan á útisvefni stendur. Hafið barnið alltaf í beisli í vagninum. Ekki er mælt með því að börn sofi úti í frosti eða roki.
• Notið hlífðarnet fyrir vagninn til að hindra að kettir og skordýr komist að barninu.
• Skiljið barn aldrei eftir eitt úti í garði eða á svölum og látið barn aldrei leika sér eitt í sandkassa en þau geta kafnað í sandi.
• Setjið aldrei barn í vöruhluta innkaupakerru.
• Ekki má reiða barn á hjóli fyrr en það hefur náð 9 mánaða aldri. Aðrar reglur gilda um aftanívagna fyrir reiðhjól en þá þarf að fylgja leiðbeiningum um rétta notkun. Klæðið barnið vel og notið CE vottaðan ungbarnahjálm.

• Barn yngra en eins árs má ekki snúa í akstursstefnu.
• Best er fyrir barn að snúa baki í akstursstefnu til 3 ára aldurs.
• Kannið ávallt áður en stóllinn er keyptur að hann passi í þá bíla sem á að nota hann í.
• Lengd barnsins segir til um hvenær útvega þarf nýjan stól, ekki þyngd né aldur. Því þarf barnið að nota ungbarnabílstólinn þangað til það hefur náð uppgefinni lengd í leiðbeiningum framleiðanda.