- Munntóbak og annað reyklaust tóbak inniheldur nikótín sem er vanabindandi efni. Almennt má segja að reyklaust tóbak, þar með talið munntóbak, gefi frá sér álíka mikið nikótín og sígarettur. Yfir daginn fá þau sem nota reyklaust tóbak að meðaltali álíka mikið og jafnvel meira nikótín í líkamann og þau sem reykja sígarettur.
- Þau sem nota reyklaust tóbak verða háð því á svipaðan hátt og reykingafólk verða háð reyktóbaki.
- Ungt fólk, sem notar munntóbak, finnur svipaða og jafnvel enn meiri nikótínþörf og fráhvarfseinkenni og þau sem reykja sígarettur. Fyrir bragðið eiga notendur munntóbaks erfitt með að hætta notkuninni.
- Reyklaust tóbak inniheldur um 2500 efni og meðal annars krabbameinsvalda og ýmis eiturefni. Um 28 krabbameinsvaldandi efni hafa fundist í reyklausu tóbaki.
- Aðal krabbameinsvaldarnir og þeir sem mest er af eru afar skæðir heilsuspillar. Þetta eru efni sem finnast eingöngu í tóbaki, svonefnd N-nítrósamín. Magn þeirra er dálítið mismunandi eftir því hvaða tóbak er um að ræða.
- Krabbameinsvaldarnir í reyklausu tóbaki geta valdið briskrabba, krabbameini í munni og krabbameini í vélinda. Reyklaust tóbak, þar á meðal sænska munntóbakið, veldur tannholdsbólgu, tannskemmdum, tannmissi, tannholdsrýrnun, fæðingu fyrir tímann og eykur líkur á meðgöngueitrun hjá bamshafandi konum. Sumar vísindarannsóknir benda til að notkun á reyklausu tóbaki geti tengst hjarta- og æðasjúkdómum, sykursýki og efnaskiptavillu.
- Þau sem nota munntóbak auka hættuna á að fá krabbamein í munnhol og briskirtil að sögn Alþjóðaheilbrigðismálastofnunarinnar.
- Notkun munntóbaks eykur hættuna á krabbameini í brisi um allt að 67%.
Hægt er að fá meðferð og stuðning við að hætta tóbaksnotkun á netspjalli hér á síðunni og í síma 5131700.
Hegðun hefur mest áhrif á lífsgæði og líðan að erfðum undanskildum. Sjáðu hvernig staðan er hjá þér.
